पत्रकारांच्या विभागीय मेळाव्यास बीड जिल्ह्यातील पत्रकारांनी बहुसंख्येने उपस्थित राहावे — दिनकर शिंदे

गेवराई ( प्रतिनिधी ) मराठी पत्रकार परिषदेच्या वतीने दि 4 जून 2023 रोजी बीड येथे पत्रकारांचा विभागीय मेळावा आयोजित केला असून या मेळाव्यास जिल्ह्यातील सर्व डिजिटल मीडिया परिषदेच्या प्रतिनिधी आणि पत्रकारांनी बहुसंख्येने उपस्थित रहावे असे आवाहन डिजिटल मीडिया परिषदेचे जिल्हा कार्याध्यक्ष दिनकर शिंदे यांनी केले आहे.
एम.आय.डी.सी.बीड येथील वैष्णवी मंगल कार्यालयात आयोजित या मराठवाड्यातील पत्रकारांच्या मेळाव्यास माजी मंत्री जयदत्त क्षीरसागर, सामाजिक कार्यकर्ते तथा निर्भय बनो आंदोलनाचे नेते डॉ.विश्वंभर चौधरी, ऍड असिम सरोदे आणि मराठी पत्रकार परिषदेचे मुख्य विश्वस्त एस.एम.देशमुख हे उद्घाटन सत्रास उपस्थित राहणार आहेत. सकाळी 9.30 वाजता मेळाव्याचे उद्घाटन करण्यात येईल. यावेळी माणिकराव देशमुख सामाजिक विकास प्रतिष्ठानच्या वतीने दिल्या जाणाऱ्या विविध पुरस्कारांचे मान्यवरांच्या हस्ते वितरण करण्यात येणार आहे. यावेळी विश्वंभर चौधरी आणि असिम सरोदे यांचे “निर्भय बनो आंदोलनातील पत्रकारांची भूमिका” या विषयावर व्याख्यानही होणार आहे. दुपारच्या सत्रात असिम सरोदे हे “पत्रकार आणि कायदा” या विषयावर मार्गदर्शन करतील. दुपारी ३ ते ४.३० या वेळेत समारोप होईल. यावेळी आमदार संदीप क्षीरसागर हे प्रमुख पाहुणे म्हणून उपस्थित राहणार आहेत. तसेच बीडच्या जिल्हाधिकारी श्रीमती दीपा मुधोळ, जिल्हा परिषदेचे मुख्य कार्यकारी अधिकारी अजित पवार, जिल्हा पोलीस अधीक्षक नंदकुमार ठाकूर, जिल्हा शल्य चिकित्सक डॉ.सुरेश साबळे, डिजिटल मीडिया परिषदेचे राज्य कार्याध्यक्ष अनिल वाघमारे आदि उपस्थित राहणार आहेत. या मेळाव्यास बीड जिल्ह्यातील सर्व पत्रकार बांधवांनी तसेच डिजिटल मीडिया परिषदेच्या सर्व पदाधिकाऱ्यांनी बहुसंख्येने उपस्थित राहावे असे आवाहन डिजिटल मीडिया परिषदेचे जिल्हा कार्याध्यक्ष ज्येष्ठ पत्रकार दिनकर शिंदे यांनी केले आहे.